ಬೆಲೆ ಏರಿಕೆಯ ಭೂತ

ಕಾಡುತಿಹುದಯ್ಯ ಬೆಲೆ ಏರಿಕೆಯ ಭೂತ 
ಮಧ್ಯ ವರ್ಗದ ಪ್ರಜೆಯು ಇದರಿಂದ ಸೋತ 
ಸಿರಿವಂತನಿಗೆ ಇದರ ಪರಿವೆಯೇ ಇಲ್ಲ 
ಕೂತಲ್ಲೆ ಬಡಪ್ರಜೆಯ ಬಾಯಲ್ಲಿ ಬೆಲ್ಲ

ಗೆದ್ದವರ ನಿದ್ದೆ

ಓ ನಾಯಕನೆ, ನಮ್ಮ ಓಟಿಂದ ಗೆದ್ದೆ 
ಈಗ ಮಾಡುತಲಿರುವೆ ಸದನದಲಿ ನಿದ್ದೆ 
ಜಾಸ್ತಿ ತಿಂದರೆ ಹೀಗೆ ಆಗುವುದು ಉಂಟು 
ಹೊಟ್ಟೆಯೊಳಗಿದೆಯಲ್ಲ ಲಂಚದ ಗಂಟು

ಹುಸಿ ದೇಶಪ್ರೇಮ

"ರಾಷ್ಟ್ರ ನಿರ್ಮಾಣದಲಿ ನಿಮಗಿಹುದು ಹಕ್ಕು"
ಎಂಬ ಮಾತನು ಕೇಳಿ ಸುಸ್ತಾದೆ ನಕ್ಕು 
ಜನರ ದುಡ್ಡನು ನುಂಗಿ ಮಾಡಿ ನಿರ್ನಾಮ 
ಜಾಹಿರಾತುಗಳಲಿ ಮಹಾ ದೇಶ ಪ್ರೇಮ

ಕೈ ರುಚಿ

ಊಟವನು ಬಡಿಸಿ ಬರುವಳು ಎನ್ನ ಬಳಿಗೆ 
ಕೇಳುವಳು, "ಓ ಸಖನೆ ಹೇಗಿಹುದು ಅಡುಗೆ" 
"ನಿನ್ನ ಕೈ ರುಚಿಯು, ಎನಗದು ಪಂಚಪ್ರಾಣ"
ಎಂದನ್ನದಿರೆ ಬೈದು ತೆಗೆಯುವಳು ಪ್ರಾಣ!

ಅಮರ

ಶಿಲ್ಪಿಯವ ಹೋದರೂ ಮಣ್ಣಲ್ಲಿ ಹೂತು 
ಅವನು ಕೆತ್ತಿಹ ಮೂರ್ತಿ ಆಡಿತದು ಮಾತು
ಹೀಗೆ, ಭುವಿ ಋಣ ತೀರಿ ನಿಂತರೂ ಉಸಿರು 
ನಿನ್ನ ಕೃತಿಯಿಂದ ಆಗಿರು ಸದಾ ಹಸಿರು

ನಾಗಿಯ ಹರಕೆ

ಭ್ರಷ್ಟ ಶಾಸಕನವನು ಮನೆ ತನಕ ಬಂದು 
ಬೇಡಿದನು ದಯವಿಟ್ಟು ಮತ ಹಾಕಿ ಎಂದು 
ನಾಗಿ ಎಂದಳು "ನನ್ನ ಚಿಹ್ನೆಯಿದು ಪೊರಕೆ,
ಈಗ ತೀರಿಸಿಕೊಂಬೆ ಬಹುದಿನದ ಹರಕೆ "

ರಾಜಕೀಯ ರಾಗ

ಮನೆಗೆ ಬರುವರು ಈಗ ವೋಟನ್ನು ಬೇಡಿ 
ಗೆದ್ದು ಬಂದರೆ ಕೊಳ್ಳೆ ಹೊಡೆಯುವರು ಕೂಡಿ 
ಮುಂದಿನ ಚುನಾವಣೆಯ ಸಮಯ ಬಂದಾಗ 
ಮತ್ತೆ ಶುರು ಪೊಳ್ಳು ಆಶ್ವಾಸನೆಯ ರಾಗ

ಮುಳ್ಳಾಗದಿರು

"ಬೆಟ್ಟದಡಿಯಲಿ ನೀನು ಹುಲ್ಲಾಗು" ಎಂದು 
ಕವಿವರ್ಯ ಗುಂಡಪ್ಪ ಹೇಳಿದರು ಅಂದು 
ಹುಲ್ಲಾಗಲಾಗದಿರೆ ಸಹ ಅಡ್ಡಿಯಿಲ್ಲ 
ಮುಳ್ಳಾಗಿ ಅನ್ಯರಿಗೆ ಚುಚ್ಚುವುದು ಸಲ್ಲ

ಮಿಂಚು ಹುಳ

ಕತ್ತಲಲ್ಲೂ ಕೂಡ ಬೆಳಕಿಹುದು ಕಂದ 
ನೋಡಬೇಕಾಗಿಹುದು ಒಳದೃಷ್ಟಿಯಿಂದ 
ನಿನ್ನೊಳಗೆ ಇಹ ಬೆಳಕ ಬೀರುತ್ತ ಸಾಗು 
ಕತ್ತಲನು ಓಡಿಸುವ ಮಿಂಚು ಹುಳವಾಗು

ನಾಳೆ

ನಾಳೆಗಳ ಚಿಂತೆಯಲಿ ಇಂದು ಕರಗಿತ್ತು 
ಮತ್ತೆ ನಾಳೆಯು ಕೂಡ ಹೀಗೇ ಆಗಿತ್ತು 
ಈ ರೀತಿ ಕಳೆದು ಜೀವನದರ್ಧ ಭಾಗ 
ಉಳಿದರ್ಧ ಭಾಗದಲಿ ನೂರೆಂಟು ರೋಗ

ಸಾಹಿತ್ಯ ಸಭೆ

ಸಾಹಿತ್ಯ ಸಂಸ್ಕೃತಿಯ ಸಭೆಗಳ ಒಳಗೆ 
ಭ್ರಷ್ಟ ನಾಯಕರಿರಲಿ ವೇದಿಕೆಯ ಕೆಳಗೆ 
ಮೈಕು ಹಿಡಿದರೆ ಇವರು, ಸಭೆಯ ರಸಭಂಗ 
ರಸ ಬಾಳೆ ತೋಟದಲಿ ಹೊಕ್ಕಂತೆ ಮಂಗ

ಜಾತಿ

ಆ ಜಾತಿ ಈ ಜಾತಿ ಮತ್ತೆ ಒಳ ಜಾತಿ 
ಇವುಗಳ ಭರಾಟೆಯಲಿ ಸತ್ತಿಹುದು ಪ್ರೀತಿ 
ನಾನೆಂಬೆ, ಮನದಿ ಹೊಲಸಿರುವವನೆ ಕೀಳು 
ಮಾನವೀಯತೆ ಇರಲು ಚಂದವೀ ಬಾಳು

ಗುಬ್ಬಚ್ಚಿ

ಗಾತ್ರದಲಿ ಅತಿ ಚಿಕ್ಕದಾದರೂ ಕೂಡ 

ಕ್ಷಣದಲ್ಲಿ ಮನವನ್ನು ಸೆಳೆಯುವುದು ನೋಡ 

ಹಮ್ಮು ಬಿಮ್ಮನು ತೊರೆದು ಆಗಿ ಗುಬ್ಬಚ್ಚಿ 

ಜನ ಮಾನಸದಿ ಸ್ನೇಹ ದೀಪವನು ಹಚ್ಚಿ 

ಕಲ್ಲು ಹೊಡೆಯುವವರು

ಒಳ್ಳೆ ಕೆಲಸದ ನಡುವೆ ಹೊಡೆಯುವರು ಕಲ್ಲು 
ಕೆಲಸ ಹಾಳಾದೊಡನೆ ಕಿಸಿಯುವರು ಹಲ್ಲು 
ಇಂಥವರನೆಲ್ಲ ಏನೆನ್ನುವುದು ಸ್ವಾಮಿ 
ಅನ್ಯರೇಳ್ಗೆಯ ಸಹಿಸಲಾಗದ ಹರಾಮಿ

ಮಂಕುತಿಮ್ಮಗೆ ನಮನ

ಮಂಕುತಿಮ್ಮನ ಕಗ್ಗಗಳಿಗೇನು ಸಾಟಿ 
ಓದಿ ಅರಗಿಸಿಕೊಳಲು ತತ್ವಗಳು ಕೋಟಿ 
ಪ್ರತಿ ಕಗ್ಗದಲ್ಲಿಹುದು ಜೀವನದ ಸಾರ 
ಗುಂಡಪ್ಪನವರು ಜ್ಞಾನದ ಮಹಾಪೂರ

ಸನ್ಮಾನ

ಸನ್ಮಾನ ಬೇಕೆಂದು ಮಾಡುತಿಹ ಕೆಲಸ 
ತಬ್ಬಿಕೊಂಡಂತದುವು ನಾರುತಿಹ ಹೊಲಸ 
ಪ್ರತಿಫ಼ಲದ ಆಸೆಯದು ಇಲ್ಲದಿರೆ ಚೆಂದ 
ನಿಜವಾದ ಗೌರವವು ಆಗಿಹುದು ಕಂದ

ಒಲವ ರಾಗ

ಹೇಳಿದೆನು- "ನೀನು ಮಾತಾಡುವುದು ಕಡಿಮೆ,

ಹೀಗಿರಲು ಹೇಗೆ ತೋರಿಸಬಲ್ಲೆ ಒಲುಮೆ 

ಆಕೆಯೆಂದಳು- "ಸಖನೆ ನೀನೇನು ಬಲ್ಲೆ,

ಒಲವ ಸಂವೇದನೆಗೆ ಇಹುದೇನು  ಎಲ್ಲೆ"

ಉಡುಗೊರೆ

ಏನು ಉಡುಗೊರೆ ಬೇಕು ಹೇಳೆನಗೆ ನಲ್ಲೆ 

ಚಂದ್ರನನ್ನೂ  ಕೂಡ ತರಬಲ್ಲೆ ಇಲ್ಲೇ 

ಆಕೆಯೆಂದಳು- "ಮಾಡಬೇಡವೋ ಜೋಕು,

ಜೊತೆಗೆ  ನೀ ಇಹೆಯಲ್ಲ ಇನ್ನೇನು ಬೇಕು"

ಹೊಲಸು

ಏನೆಂದು ಬಣ್ಣಿಸಲಿ ಭಾರತದ ಸೊಗಸು 

ನಾರುತಿದೆ ರಾಜಕಾರಣವಾಗಿ ಹೊಲಸು 

ಲೋಕ ಸಭೆಯೊಳಗೆ ಗೆದ್ದವರದ್ದು  ನಿದ್ದೆ 

ಸೋತವಗೆ ರಾಜ್ಯಸಭೆಯಲ್ಲೊಂದು ಹುದ್ದೆ 

ಉಗ್ರ

ಕೇಸರಿಯವರೆಲ್ಲ  ಉಗ್ರರು ಎಂದ ಶಿಂಧೆ 

ಯಾವ ದೇಶದಿ ಹುಟ್ಟಿ ನೀನಿಲ್ಲಿ ಬಂದೆ ?

ಇಂಥವರು ತುಂಬಿರುವ ನಮ್ಮ ಸರಕಾರ
ಮಾತಲ್ಲಿ ಬಲು ಮುಂದು, ಅಭಿವೃದ್ಧಿ ದೂರ v