ಜ್ಞಾನೋದಯ

ಬುದ್ಧನಾಗಲು 
ಕಾಡಿಗೇ ಹೋಗಬೇಕಂತಿಲ್ಲ;
ಶ್ರದ್ಧೆಯಿದ್ದರೆ 
ಮನೆಯ ಮಾಡಿನ ಕೆಳಗೂ 
ಆಗಬಹುದು ಜ್ಞಾನೋದಯ!

ಯಾನ

ಮಲ್ಯರ ವಿಮಾನ 
ತೇಲದಿದ್ದರೂ
ಆಗಸದಲಿ,
ತೇಲುತ್ತಿದ್ದಾರೆ 
ಅವರ 
ಬೀರು ಕುಡಿದವರೆಲ್ಲ 
ಗಾಳಿಯಲಿ!

ಖುಷಿ

ಸಖೀ, ಒಮ್ಮೊಮ್ಮೆ 
ಯಾರಾದರೂ ನಮ್ಮ 
ಕಾಲೆಳೆಯುತ್ತಿದ್ದರೆ 
ಕೆಲವರಿಗೆ ಅದ ನೋಡುವುದು
ಭಾರೀ ಖುಷಿ;
ಇರಲಿ ಖುಷಿ ಪಡಲಿ,
ಅವರ ಖುಷಿಯೇ 
ನಮ್ಮ ಖುಷಿ!

ಆಶಯ

ಸಿದ್ರಾಮಯ್ಯನವರಿಗೆ 
ಶುಭ ಹಾರೈಕೆ,
ಆಗಲಿ ಕರ್ನಾಟಕ 
ಅಭಿವೃದ್ಧಿಯ ತಾವು;
ಮರೆಯಾಗದಿರಲಿ 
ರಾಜ್ಯದಲ್ಲಿ ಗೋವು!

ಮಳೆ

ವರ್ಷ ಧಾರೆ,
ಭೂಮಿಯ ಘಮ;
ನಿನ್ನ ಕಣ್ಣ 
ಮಿಂಚು!

ರಿಷಿ"ಕಾ"

ಯಕ್ಷಗಾನ ಪದ್ಯಗಳ "ಡಬ್ಬಾ"
ಎಂದಳಂತೆ 
ಮಹಾ ಮೇಧಾವಿ ರಿಷಿಕಾ;
ಕಲೆಯ ಅರ್ಥೈಸಿಕೊಳ್ಳಲೂ
ಯೋಗ್ಯತೆ ಬೇಕು
ಕಿರುಚಿದಂತಲ್ಲ 
ಬಿಗ್ ಬಾಸ್ ನಲ್ಲಿ "ಕಾ ಕಾ"!

ಚೆಕ್ಕು ಬುಕ್ಕು

ಅಂದು ಮನೆಗೆ 
ಹೋದೊಡನೆ 
ಪ್ರೀತಿಯ ಸುರಿಮಳೆ,
ರಾಜ ಸತ್ಕಾರ ಸಿಕ್ಕಿತ್ತು;
ಏನು ವಿಶೇಷ ಎಂದು 
ಯೋಚನೆ ಮಾಡುತ್ತಿದ್ದೆ-
ನನ್ನೆದುರು ಖಾಲಿ ಚೆಕ್ಕಿತ್ತು!

ಕರ ಕರ

ಸರ್ಕಾರ ಹೇಳುತ್ತದೆ-
"ಸಮಯಕ್ಕೆ ಸರಿಯಾಗಿ 
ಆದಾಯ ಕರ ಕಟ್ಟಿ";
ದಿನ ಬಳಕೆ ವಸ್ತುಗಳ 
ದರ ಮಾತ್ರ 
ದಿನೇ ದಿನೇ ತುಟ್ಟಿ!

ಬೈನರಿ

ಮದುವೆಯ ಹೊಸತರಲಿ 
ಮಾತು ಮಾತಿಗೂ 
"ಚಿನ್ನು, ಡಾರ್ಲಿಂಗ್, ಮರಿ";
ಕೆಲವು ವರುಷಗಳ ಬಳಿಕ 
ಮಾತುಗಳು ಕಡಿಮೆ 
ಏನಿದ್ದರೂ ಬೈನರಿ!

ಸರಕಾರ

ಲಕ್ಷಗಟ್ಟಲೆ ಖರ್ಚು 
ಮಾಡಿ ಪ್ರಮಾಣ ವಚನ 
ಸ್ವೀಕಾರ;
ಬಳಿಕ ಪ್ರಮಾಣ ಮಾಡಿದ 
ಕೈಯಿಂದಲೇ 
ಲಂಚ ಸ್ವೀಕಾರ!

ವಿಪರ್ಯಾಸ

ಲಂಚ ಪಡೆಯುತ್ತ,
ಕೊಡುತ್ತ ಇರುವವರಿಗೆ 
ಸ್ವರ್ಗ;
ನಿಷ್ಠಾವಂತರಿಗೆ 
ಬೇರೆ ಕಡೆ ವರ್ಗ!

ಶ್ರೀ

ರನ್ ಹೊಡೆಯಲಾಗದೆ 
ತಂಡದಿಂದ ಹೊರಗಾಗಿದ್ದಕ್ಕೆ 
ಸೆಹ್ವಾಗ್ ಚಿಂತಾಕ್ರಾಂತ;
ಇತ್ತ ನೋ ಬಾಲ್ ಹಾಕಿಯೇ 
ಶ್ರೀಮಂತನಾದ ಶ್ರೀಶಾಂತ!

ದರ್ಜಿ

ಕವಿಯಾಗಲಿ ಸಮಾಜದ 
ಒಡಕುಗಳ ಬೆಸೆಯುವ ದರ್ಜಿ;
ಪ್ರಶಸ್ತಿಗಳಿಗಾಗಿ ಅರ್ಜಿ 
ಹಾಕುವುದಷ್ಟೇ 
ಆಗದಿರಲವನ ಮರ್ಜಿ!

ಒಂದೇ ಉತ್ತರ

ಮನೆಗೆ ತಡವಾಗಿ ಬಂದ 
ಗಂಡನಿಗೆ ಆಕೆ ಕೇಳಿದಳು-
"ಯಾಕೆ ಇಂದು ತಡ ರೀ?";
ಮರು ಯೋಚಿಸದೆ ಆತನೆಂದ-
"ಸಾರೀ ಸಾರೀ ಸಾರೀ"!

ಫಿಕ್ಸಿಂಗ್

ಶ್ರೀಶಾಂತ 
ಕರವಸ್ತ್ರ ತೋರಿಸಿ 
ಮಾಡಿದ ಫಿಕ್ಸಿಂಗ್;
ನಮ್ಮ ರಾಜಕಾರಣಿಗಳೂ 
ಮಾಡುತ್ತಾರೆ 
ಖಾದಿ ವಸ್ತ್ರ ತೋರಿಸಿ!

ವಿನಂತಿ

ಫಿಕ್ಸಿಂಗ್ ನ ಸಂತೆ 
ಐ. ಪಿ. ಎಲ್ ಹೆಸರಲ್ಲಿ 
ಅದೆಷ್ಟು ದುಡ್ಡು ಪುಡಿ;
ಮುಂದಿನ ವರ್ಷ 
ಆಡುವುದು ಬೇಡ 
ನೇರ ಫಲಿತಾಂಶ ಹೇಳಿ ಬಿಡಿ!

ಮುತ್ತು

ನೀನಿರುವಾಗ ನನಗೇಕೆ
ಮುತ್ತು, ರತ್ನ, ಹವಳ;
ನಿನ್ನ ಮುತ್ತೇ ರತ್ನ, ಹವಳ!

ಸಮರಸ

ಇತ್ತೀಚಿಗೆ ಹೆಚ್ಚಾಗಿದೆ 
ಬಿಸಿಲುರಿ, 
ಜಾತಿವಾದದ ದಳ್ಳುರಿ- 
ತಣಿಸಲು ಬೇಕಾಗಿದೆ:
ನಿಂಬೆ ರಸ, ಕಿತ್ತಳೆ ರಸ,
ಜೊತೆಗೆ ಸಮರಸ!

ನಮ್ಮ ಅ(ವ್ಯ)ವಸ್ಥೆ

ಹಿಂದಿನ ಅವಧಿಯಲ್ಲಿ 
ಮುಕ್ಕಿ ತಿಂದಿದ್ದು 
ಇನ್ನೂ ಆಗಿರಲಿಲ್ಲ ಪಚನ;
ಅಷ್ಟರಲ್ಲೇ 
ಮತ್ತೆ ಮಂತ್ರಿಯಾಗಿ 
ಪ್ರಮಾಣ ವಚನ!

ಮಕ್ಕಳು ಹೂಗಳು

ಮಕ್ಕಳು ಹೂಗಳಿದ್ದಂತೆ
ಎಂದು ಹೇಳಿದರು
ಜವಾಹರಲಾಲ ನೆಹರು;
ಅವರವರ ಮಕ್ಕಳನ್ನು
ಹೂಗಳಂತೆಯೇ
ನೋಡಿಕೊಳ್ಳುತಿಹರವರ
ಕುಟುಂಬದವರು!