ಸೌಂದರ್ಯ ಮನದಲಿಹುದು.. ದೇಹದಲಲ್ಲ...

ಚಿಗರೆಯಾ ಮರಿಯದೋ
ಪುಟಿಯುತ್ತ ಓಡುತಿದೆ
ಅದ ಹಿಡಿಯಲೆಂದು ನಾನು ಹೊರಟೆ
ನೋಡಲಾ ಸೌಂದರ್ಯ,
ನಾಜೂಕು ನಡಿಗೆಯನು
ಮನದಲೇನೋ ತುಮುಲ ಏನೋ ಕಾಣೆ


ಮನಸು ಹಿಡಿತದಲಿಹದೆ
ಅದ ಹಿಡಿಯಬೇಕೆನಿಸಿ
ಓಡುತಲಿ ಹೊರಟೆ ಹಿಂದೆ ನಾನು
ನನ್ನ ಸಂಗವು ಬೇಡ
ಎನ್ನುತಲಿ ಆ ಮೃಗವು
ಮಾಯವಾಯಿತು ಎರಡು ಕ್ಷಣಗಳಲ್ಲೇ


ಮಾಯಾಮೃಗವನ್ನು
ಹುಡುಕುತ್ತ ಹೊರಟಿರುವೆ
ಸಿಗದು ಅದು ಎಂದೂ ತಿಳಿದು ಕೂಡ
ಅಕ್ಕ ಪಕ್ಕದಲಿರುವ
ಸಾಮಾನ್ಯ ಜೀವಿಗಳ
ಕಿಂಚಿತ್ತು ದೃಷ್ಟಿಯಲಿ ನೋಡುತಿರುವೆ


ಸೌಂದರ್ಯ ಕ್ಷಣ ಮಾತ್ರ
ಅದ ನೋಡಿ ಹೋಗದಿರು
ನಿಜವಾದ ಸೌಂದರ್ಯ ಮನದಲಿಹುದು
ಹೃದಯ ಸೌಂದರ್ಯವನು
ಗ್ರಹಿಸ ಬಲ್ಲವನಿಂಗೆ
ಜೀವನದ ದೋಣಿಯಲಿ ತೃಪ್ತಿ ಇಹುದು..