ಜಲಿಯನ್ವಾಲಾಬಾಗನಲ್ಲಿ ಜೊಲ್ಲು ಸುರಿಸಿದ ನಾಯಿ

ಸ್ವಾತಂತ್ರ್ಯ ರಣಕಹಳೆ 

ರುದ್ರ ರೂಪವ ತಾಳಿ 

ಎಲ್ಲರಾ ಹೃದಯದಲಿ 

ಕ್ರಾಂತಿಗೀತ 

ದೇಶಭಕ್ತರು ಎದ್ದು 

ಆಗಿಹರು ರಣಹದ್ದು 

ಬಿಳಿಯರನು ಕಿತ್ತದುವೆ 

ತಿನ್ನಲೆಂದು 

ಜಲಿಯನ್ವಾಲಾ-

-ಬಾಗಿನಾ ಮಧ್ಯದಲಿ 

ಸ್ವಾತಂತ್ರ್ಯ ಅಗ್ನಿಯನು

ಉರಿಸುತಿಹರು 

ಪಕ್ಕದಾ ಬೀದಿಯಲಿ 

ಹಸಿದ ಶ್ವಾನವು ಒಂದು 

ಜೊಲ್ಲನ್ನು ಸುರಿಸುತ್ತ 

ನಿಂತಿರುವುದು 

ತನ್ನ ಹಸಿವಿನ ಅಗ್ನಿ

ತಂಪುಗೊಳಿಸಲು ಅದುವು

ರಕ್ತ ಮಾಂಸವ ತಿನಲು

ಕಾಯುತಿಹುದು 

ತನ್ನವರು, ಪರಕೀಯ 

ಎಂದೆನದೆ ಈ ಶ್ವಾನ 

ಎಲ್ಲರನು ಸೀಳುತ್ತ 

ತಿನ್ನುತಿಹುದು 

ಆ ನಾಯಿ ಮತ್ತೀಗ 

ಮರುಜನ್ಮ ಪಡೆದಿಹುದು 

ಭ್ರಷ್ಟ ಜನ ನಾಯಕನಾ 

ರೂಪ ತಳೆದು 

ದೇಶವನು ಕಿತ್ತವನು 

ತಿನ್ನುತ್ತ ತೇಗುತ್ತ

ಭೂರಿ ಭೋಜನವನ್ನು

ಮಾಡುತಿಹನು