ಸಾವಿನ ಮನೆ

ಮೆತ್ತನೆಯ ತಂಗಾಳಿ ಕತ್ತ ಕೊಯ್ದಂತಿಹುದು

ಹೃದಯದಲಿ ಬಿರುಕೊಂದು ಬಿದ್ದಿರುವುದು 

ಬೇಸಿಗೆಯ ಬೆಳಕಲ್ಲು ಕತ್ತಲೆಯು ಮುಸುಕಿಹುದು 

ಕಾರ್ಮೋಡ ಗಹ ಗಹಿಸಿ ನಗುತಲಿಹುದು 

ಊರ ಪಡಸಾಲೆಯಲಿ ಘೋರ ಮೌನದ ಕುಣಿತ 

ಮುದಿಕಾಗೆ ಭಯದಿಂದ ಕೂಗುತಿಹುದು 

ಮನೆಯ ಮುದ್ದಿನ ಬೆಕ್ಕು ಬೆಚ್ಚಿ ಬೊಬ್ಬಿಡುತಿಹುದು

ಖೇದ ನಾದವು ಕಿವಿಯ ಒದೆಯುತಿಹುದು 

ಖಗ ಬಳಗ ತರ ತರದ ಅಪಸ್ವರವ ಬೀರುತ್ತ

ದಿಕ್ತಪ್ಪಿ ಎಲ್ಲೆಲ್ಲೋ ಹಾರುತಿಹುದು 

ಊರ ಮೂಲೆಯ ಪಾಳು ಗುಡಿಯ ಮಂಟಪದಿಂದ 

ನಾದಸ್ವರ ನಾದವದು ಗುನುಗುತಿಹುದು 

ಬಟ್ಟ ಬೇಸಿಗೆಯಲ್ಲಿ ಮೇಘ ಧಾರೆಯು ಸುರಿದು

ಭುವಿ ಅಶ್ರುತರ್ಪಣವ ಮಾಡಿರುವುದು 

ರವಿಯವನು ಈ ಘೋರ ದೃಶ್ಯ ನೋಡೆನು ಎಂದು 

ಮೋಡದಾ ಮರೆಯಲ್ಲಿ ಸರಿಯುತಿಹನು.........