ಶಾಲು ಹೊದಿಸಿ ಸನ್ಮಾನ

ಊರ ಕಟ್ಟೆಯ ಪಂಚಾಯತಿಯಲಿ 

ದೊಡ್ಡದೊಂದು ಸಮಾರಂಭವು

ಜನ ನೆರೆದಿಹರು ಕಿಕ್ಕಿರಿದು 

ಎಲ್ಲೆಲ್ಲೂ ಕೇಕೆಯು

ಅಲ್ಲಲ್ಲಿ ಸಾರಾಯಿ ಖೊಟ್ಟೆಗಳು 

ಬಂದಿಹರಲ್ಲಿ ಜನ ನೂರು ಸಾವಿರ

ಪುಡಿಗಾಸಿನ ಮೋಹದಲಿ 

ಕೆರೆಯ ನೀರಿನ ಒಂದು ಲೋಟವನು

ಚೆಲ್ಲುತಿಹರವರು ಕೆರೆಗೆ 

ಅವರದೇನು ಹೋಗುವುದು ಗಂಟು 

ಜನ ಮರುಳಾಗಿ ಕೈ ಚಾಚುತಿಹರು 

ಕಾಂಚಾಣದ ಮೋಹದಲಿ 

ಹೇಳುವನವನು ಗೆಲ್ಲಿಸಿ ನನ್ನನ್ನು 

ದೇಶವ ಮಾಡುವೆ ನಾಕ 

ಜನ ತಟ್ಟುತಿರುವರು ಚಪ್ಪಾಳೆಯ 

ತಿಳಿದೂ ಸಹ, -"ಅವನ ಮಾತಿನಲಿಲ್ಲ ತೂಕ"

ದುರ್ಯೋಧನ, ದುಷ್ಯಾಸನರು ಬಂದಿಹರು

ರಾಮ ಲಕ್ಷ್ಮಣರ ಮುಖವಾಡ ತೊಟ್ಟು 

ಹಾಡ ಹಗಲಲೇ ಊರ ಲೂಟಿ ಮಾಡಿದವರು 

ತೊಟ್ಟಿಹರು ದೇಶ ರಕ್ಷಣೆಯ ಶಪಥವ 

ಊರ ಅಮಾಯಕರ ಬಟ್ಟೆಯ ನೂಲೆಳೆದು 

ಮಾಡಿದ ಶಾಲು ಹೊದಿಸಿ ಇವರಿಗೆ ಸನ್ಮಾನ...