ಅಸ್ತಮಾನವೋ?? ಹೊಸ ಉದಯವೋ??

ನಾಭಿ ಹಗ್ಗವು ಕಡಿದು, ಗರ್ಭದಾಲಯ ತೊರೆದು 

ಬಂತು ಶಿಶುವದು ಹೊರಗೆ ಮಾತೃ ಬಂಧವ ತೊರೆದು 

ಜಾರಿತಾ ತನುವದುವು ಮಾತೆಯಾ ಮಡಿಲಿಂದ 

ಲೋಕಕರ್ಪಣೆಯಾಯ್ತು ಜನಿಸಿದಾ ದಿನದಿಂದ 

ಮಾತೆ ಗರ್ಭದಲದಕೆ ಉಣಬಡಿಸಿ ಧೈರ್ಯವನು

ಛಲ ಸ್ಥೈರ್ಯ ಬಲ ಬೀಜ ಬಿತ್ತಿ ಚಿಗುರೊಡೆಸಿಹಳು 

ರಕ್ತದಲಿ ಅನುರಾಗ ಧಾರೆಯನು ಎರೆದವಳು 

ಕರುಳ ಬಳ್ಳಿಯ ಬಂಧ ಜೋಡಿಸದು ಕಳಿಸಿಹಳು 

ಅವಳ ಕೊನೆಯುಸಿರಿನಲಿ, ಶಿಶುವಿನಾ ಭುವಿ ಸ್ಪರ್ಷ

ಆ ಉಸಿರಿನಲಿ ಪ್ರೀತಿ ಸಾಗರವ ಹರಿಸಿಹಳು 

ತನ್ನೆದೆಯ ಜ್ಯೋತಿಯನು ಕೂಸ ಗುಂಡಿಗೆಯಲ್ಲಿ 

ಬೆಳಗಿ ಆ ತೃಪ್ತಿಯಲಿ ಪ್ರಾಣವಾ ತೊರೆದಿಹಳು 

ರವಿಗೆ ಮೊರೆಯಿಟ್ಟಿಹಳು ಬೆಳಕ ತೋರದಕೆಂದು 

ಕಾಲನಿಗೆ ಕೈ ಹಿಡಿದು ನಡೆಸೆಂದಳು 

ತಂಗಾಳಿಗೆಂದಳು ಆಹ್ಲಾದ ನೀಡೆಂದು 

ಆಗಸದಿ ಆಶ್ರಯವ ಕೋರುತಿಹಳು

ದೇವನಾ ಮಡಿಲಲ್ಲಿ ಹಸುಗೂಸ ತಾನಿಟ್ಟು

ಪ್ರೀತಿಯರಮನೆ ಕೀಲಿ ಕೊಡು ಎಂದಳು 

ಭುವಿಯೇ ಅರಮನೆಯಿವಗೆ, ದೇವ ಪಾಲಕನವನು 

ವಿಶ್ವವೇ ಪರಿವಾರ, ಭವ ಬಂಧವು....