ಸತ್ಯದ ಹೆಣದ ಮೇಲೆ ಸುಳ್ಳಿನ ಕೋಟೆ.....

ತೇಲಿ ಬರುತಿಹುದಲ್ಲಿ ಸತ್ಯದಾ ಕಳೇಬರ 
ಕಾಯುತಿವೆ ಶ್ವಾನಗಳು ಕಿತ್ತು ತಿನಲು 
ಕೊಂದಿರುವ ಪ್ರಾಣಿಗಳು ಮೂಸದೆ ಬಿಟ್ಟಿಹವು
ತಮ್ಮ ಸುಳ್ಳನು ಸತ್ಯ ಮಾಡಿಕೊಂಡು

ಸತ್ಯದಾ ಹೆಣವಿಹುದು ಸುಳ್ಳ ಕೋಟೆಯ ಕೆಳಗೆ
ಕೋಟೆಯನು ಆಳುವವ ಧೂರ್ತನೊಳಗೆ
ಸತ್ಯಾಸ್ತಮಾನವು ಆಯಿತೆಂಬ ಧೈರ್ಯದಲಿ
ಸುಳ್ಳ ಬಲೆಯನು ಹೆಣೆದಿರುವ ಹೊರಗೆ

ಮಾಡುತಿರುವನು ಇವನು ಸತ್ಯದಾ ತಿಥಿಯೂಟ
ತಾನು ಗೆದ್ದೆನೆಂಬ ಖುಶಿಯ ಭರದಿ
ತನಗೇನು ಭಯವಿಲ್ಲ, ಸತ್ಯ ಮರಣಿಸಿದೆಯೆನಲು
ಸತ್ಯವೆಂದಿತನ್ನಾತ್ಮ ಇಲ್ಲೇ ಇಹುದು