ನಾನೊಬ್ಬ ದರ್ಜಿ,
ಹೊಲಿಯುವೆನು ಅಂಗಿ.
ಹರಿದ ಬಟ್ಟೆಯ ನಾನು,
ಜೋಡಿಸುವೆ ತಂಗಿ.
ಕೊಂಚ ಹರಿದಾಗಲೇ
ತಾ ಇಲ್ಲಿ ಅರಿವೆ,
ಅಲ್ಲೆ ಕಿರು ಹೊಲಿಗೆಯನು
ಹಾಕಿ ನಾ ಕೊಡುವೆ.
ಚಿಕ್ಕದಾ ತೂತೆಂದು
ಕಡೆಗಣಿಸಬೇಡ,
ತೂತದುವೆ ಬಟ್ಟೆಯನು
ಹರಿಯುವುದು ನೋಡ.
ಸಂಬಂಧಗಳಲು ಸಹ
ಈ ಮಾತು ದಿಟವು,
ಬಲು ಸೂಕ್ಷ್ಮವಾಗಿಹುದು
ಮನಸಿನಾ ಪುಟವು.
ಮನಸ್ತಾಪಗಳದುವೆ
ಮನುಜನಲಿ ಸಹಜ,
ಶುರುವಿನಲೆ ಕೊಂದು ಬಿಡು
ದ್ವೇಷದಾ ಬೀಜ,
ಬೀಜ ಹೆಮ್ಮರವಾಗಿ
ಬೆಳೆದು ಬಿಡೆ ಅದುವು
ಎಂದಿಗೂ ಚಿಗುರಿಪುದು,
ಬೆಂಕಿಯಾ ಹೂವು.
ಬಾಳಿದೋ ಎರಡು ದಿನ
ಪರಶಿವನ ಮರ್ಜಿ ,
ಆಗು ನೀ ಸಂಬಂಧ
ಬೆಸೆಯುವಾ ದರ್ಜಿ.....
ಪರೇಶ್, ಜೀವನದ ಸಂಬಂಧಗಳ ಬಗ್ಗೆ ಎಷ್ಟು ಸೂಕ್ಷ್ಮವಾಗಿ, ಚೆನ್ನಾಗಿ ಹೇಳಿದ್ದಿರಿ....ಮನ ಮುಟ್ಟುವ ಕವನ. ನಿಮ್ಮಿಂದ ಮತ್ತಿಷ್ಟು ಕಲಾಸೇವೆ ನಡೆಯಲಿ ಎಂಬುದು ಈ ಶೀಲಕ್ಕಳ ಹಾರೈಕೆ!
ReplyDelete