ಎಳೆಯೋಣ ಭಾರತಾಂಬೆಯ ತೇರು

"ಕೊಡು ನನ್ನ ಕೈಗೆ ಧ್ವಜ,

ನೆಡುವೆ ಅದನು ನಭೋಮಂಡಲದಲಿ"

ಎನುತಿದೆ ಈ ಪುಟ್ಟ ಕಂದ.

ಅದರ ನಿರ್ಮಲ ಹೃದಯ

ಪಟ ಪಟ ಬಡಿದು ಹೇಳುತಿದೆ,

"ವಿಶ್ವದಲಿ ನನ್ನ ದೇಶವೇ ಚೆಂದ" ||

ದುಷ್ಟ ನಾಯಕರು ತಿಂದು,

ದಷ್ಟ ಪುಷ್ಟವಾಗಿ, ಇಷ್ಟವಾದುದ ಮಾಡಿ

ಮೆರೆಯುತಿರುವಾಗ,

ಕ್ಲಿಷ್ಟ ಪ್ರಪಂಚದ ಕಷ್ಟ ಗೊತ್ತಿರದ

ಈ ಕೂಸಿಗೆ ಸ್ಪಷ್ಟವಾಗಿ ಕಾಣುತಿರುವುದು

ಆ ಮೂರು ಬಣ್ಣಗಳು- ಕೇಸರಿ,ಬಿಳಿ,ಹಸಿರು

ಈತ ಭಾರತದ ಹೊಸ ಚಿಗುರು. ||

ಉದಯವಾಗಲಿ ಎಲ್ಲರಲು ದೇಶಭಕ್ತಿಯ ನಿರ್ಮಲ ಚಿಲುಮೆ

ಭಾರತವು ತನ್ನ ಮನೆಯೆಂಬ ಸ್ವಂತಿಕೆಯ ಒಲುಮೆ||

ಕೂಡಿದರೆ ಸೊಗಸು ಹೊಸ ಚಿಗುರು ಹಳೆ ಬೇರು

ಎಲ್ಲ ಸೇರಿ ಎಳೆಯೋಣ ಭಾರತಾಂಬೆಯ ತೇರು||