ಯಾರು ಮುತ್ತೈದೆ?

ಹೃದಯ ಸಿಂಹಾಸನದಲವನು

ರಾರಾಜಿಸುತಿರುವ

ಕಾಣುವ,ತುಟಿಯಂಚಿನ ನಗುವಲಿ 

ಮನದಾಳದ ನೋವಲಿ 

ಕಣ್ಣಂಚಿನ ನೀರಲಿ 

ಹೊರ ಬರಲಾಗದೆ ಒದ್ದಾಡುತಿರುವ

ಒಲವಲಿ, ಮಾನಸದಲವನು

ಆರದ ನಂದಾದೀಪ 

ಕೈಯಲ್ಲಿಲ್ಲ ಹಸಿರು ಬಳೆ,ಕುಂಕುಮದ ಬೊಟ್ಟಿಲ್ಲ 

ತಾಳಿಯ ಸರವಿಲ್ಲ 

ಸಮಾಧಿಯಾಗಿರುವವವು
ಕಟ್ಟುಪಾಡುಗಳ ಹೊಂಡದಲಿ 

ಅವಳಿನಿಯನ ದೇಹದ ಜೊತೆ 

ಕಟ್ಟಿರುವಳಿವಳು ನೆನಪಿನ ಕೋಟೆ

ಗುಂಡಿಗೆಯ ಮಧ್ಯದಲಿ 

ಸಿಂಹಾಸನದಲ್ಲಿ ಕುಳಿತಿರುವನವ

ಇಲ್ಲೊಬ್ಬಳು ಗಂಡನ ದುಡ್ಡಿನ 

ಕೋಟೆಯ ಮಧ್ಯ, 

ಹೊಂಚು ಹಾಕುತಿರುವಳು ಎಲ್ಲ ಹೊಡೆಯಲು

ಆಗಿರುವಳು ಕಾಂಚಾಣಕೆ ಮದುವೆ

ಅವನಿಗಲ್ಲ, 

ಇವಳ ತಾಳಿ ಅವನ ಕತ್ತಿಗೆ ನೇಣು, 

ಅವನು ಅರ್ಧಾಂಗಿ ತೋರಿಕೆಗೆ 

"ಯಾರು ಮುತ್ತೈದೆ?"