ಇಳೆ-ಕೊಳೆ

ಇಳೆಯವಳು ಮೈದಳೆದು ನಿಂತಿಹಳು 

ಹೊರಗೆ ಬಿನ್ನಾಣ, ಚೆನ್ನ 

ನಗುತಿಹಳು ಎಂದಿನಂತೆ 

ತ್ಯಾಗಮಯಿ, ಎಲ್ಲರಮ್ಮ 

ಕೋಟಿ ಮಕ್ಕಳ ಹೊತ್ತು 

ತನುಜರಿವರು ಅಂಧರೇ ?

ಆಸೆಯಾ ಮಿತಿ ಮೀರಿ 

ಕಿತ್ತು ತಿನ್ನುತಿರುವರವಳ 

ಹತ್ತು ಹಲವೆಡೆಯಿಂದ

ಚಿತ್ತವೊತ್ತಿ ಹಿಡಿದಿಹಳವಳು 

ತಾಯಿಯನುರಾಗದಲಿ 

ವಿಷದನಿಲ ಹೊರಗೆಡವಿ  

ಛಿದ್ರವದು  ಪುಪ್ಪುಸವು 

ರಕ್ತವನು ಕೊಳೆ ನೀರ ಮಾಡಿರುವರು 

ಹುಟ್ಟಿದುದರದಿ ಕೆಸರ ಎರಚಾಡಿ 

ಮೆರೆಯುತಲಿ ಅಮ್ಮನನೆ

ಮೈಲಿಗೆಯ ಮಾಡಿರುವರು 

ಭುವಿ ತಾಯಿ ನರಳುತಿರೆ 

ತನ್ನೊಡಲ ಬೇಗೆಯಲಿ 

ಯಾರದೋ ಎಂಬಂತೆ ಕುಳಿತಿರುವರು

ತಾಯ ನೆರಳಲಿ ಬದುಕಿ 

ಬಯಸಿ ಅವಳಿಗೆ ಕೆಡುಕು 

ತಾನಲ್ಲವೆಂಬಂತೆ ಮಲಗಿರುವರು 

ಇಳೆಯವಳು ಮುನಿದರೆ 

ಸಕಲ ಸಂತತಿ ನಾಶ 

ಅವಳೇನೆ ನಮ್ಮಲಿಹ 

ಜೀವಕೋಶ 

ಮೂಢ ಮನುಜರು ಇವರು 

ರಾಡಿ ಮಾಡುತಲಿಹರು

ಎಂದು ನಿಲ್ಲುವುದಿವರ 

ಹುಚ್ಚು ವೇಷ??!!!!!